МОСКВА (АА) – Украинскиот претседател Владимир Зеленски денес го обвини својот американски колега Доналд Трамп дека е „заробен во простор на дезинформации“, изразувајќи надеж дека тимот на Трамп ќе добие појасна слика за, како што рече, „вистината за Украина“, јавува Анадолу.
Говорејќи на прес-конференцијата во Киев, Зеленски ги отфрли последните тврдења на Трамп, кој наведе дека рејтингот на украинскиот претседател во неговата земја изнесува само 4 проценти.
„Ја видовме оваа дезинформација и разбираме дека таа потекнува од Русија. Имаме докази дека овие бројки се дискутираат меѓу американски и руски претставници. За жал, Трамп е заробен во овој простор на дезинформации“, изјави Зеленски.
Тој го обвини Трамп дека му помага на рускиот претседател Владимир Путин во обидите да ја ослабне меѓународната изолација на Русија поради војната во Украина и други прашања.
Зеленски, исто така, го критикуваше американскиот државен секретар Марко Рубио за тоа што ситуацијата во Украина ја нарече „конфликт“ наместо „војна“, оценувајќи дека тоа е сигнал за „омекнување“ на ставот на Вашингтон.
Во исто време, тој изрази подготвеност да ја брани својата позиција. „Ова не е мојот прв дијалог или битка, смирено го прифаќам тоа“, рече Зеленски.
Реагирајќи на изјавите на Трамп за недостиг на транспарентност во трошењето на американската финансиска помош за Украина, Зеленски призна дека е потребна јасност по ова прашање.
Според неговите пресметки, досега војната ја чинела Украина 320 милијарди долари, од кои 120 милијарди долари биле од украински извори, а 200 милијарди долари биле обезбедени од ЕУ и САД.
Тој нагласи дека Вашингтон ѝ има доделено на Украина околу 67 милијарди долари, како и дополнителни 31,5 милијарди долари директна финансиска помош за буџетот на земјата.
Зеленски изјави дека европските земји остануваат воено слаби и покрај одредени подобрувања.
„Во однос на бројот на војници, борбените единици, флотата, воздухопловните сили и беспилотните летала, денес Европа е слаба“, рече тој.
Притоа нагласи дека „Украина нема да може да постигне победа без поддршка од САД“, но исто така додаде дека Киев нема да прифати никакви договори направени без негово учество. Ова се однесува на првичните разговори меѓу САД и Русија во Ријад за завршување на тригодишната војна, каде што европските земји не биле вклучени.
Запрашан за нацрт-договорот за ретките метали со САД, Зеленски го критикуваше документот, велејќи дека единствено јасно нешто е дека Украина треба да се откаже од 50 проценти од сите наведени ресурси.
„Овој документ не е подготвен. Тој ги надминува моите овластувања, ги надминува Уставот и законите на Украина. Каква е јурисдикцијата во Њујорк? Нема никакви безбедносни гаранции“, истакна тој.
Извор: Anadolu Agency (AA)
