ГАЗА (АА) – Група палестински затвореници ослободени денеска од израелските затвори пристигнаа со автобус во градот Хан Јунис, во јужниот дел на Појасот Газа, јавува Анадолу.
Ослободените затвореници биле директно однесени во Европската болница во Хан Јунис на медицински прегледи.
Според Канцеларијата за медиуми на палестинските затвореници, еден од затворениците, Надер Џамал Хусеин од бегалскиот камп Џабалија, бил префрлен во болница со возило на брза помош.
Хусеин имал видливи повреди и модринки по лицето и телото.
Медицински извори за Анадолу изјавиле дека Хусеин не можел да стои на нозе и значително е ослабен.
Оваа последна размена е дел од ослободувањето на заробениците според договорот за прекин на огнот. Израел денес треба да ослободи вкупно 369 Палестинци. Меѓу нив 36 лица издржувале доживотна казна затвор.
Денес палестинските групи ослободија тројца израелски затвореници во источниот град Хан Јунис, во јужниот дел на Појасот Газа.
Договорот за прекин на огнот и размена на заробеници во Појасот Газа е на сила од 19 јануари, со што е прекината геноцидната војна на Израел во која се убиени повеќе од 48.200 Палестинци, главно жени и деца, а палестинската енклава е речиси целосно разурната.
Меѓународниот кривичен суд во ноември минатата година издаде налози за приведување на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.
Израел е обвинет за геноцид пред Меѓународниот суд на правдата поради неговата војна во енклавата.
Извор: Anadolu Agency (AA)
