Минималната плата од 1 март во земјава ќе изнесува околу 24.400 денари колку што би било законското усогласување. За минималец од 500 евра за работодавачите нема шанси, но синдикалците не се откажуваат-не ја исклучуваат можноста од излегување на улица. Работодавачите не отстапуваат од законското усогласување, а Владата барем според нив не прифаќа да не наплати дел од придонесите за таа да се искачи на 500 евра.
„Ставот на Организација на работодавачи е дека не прифаќаме ништо повеќе од законското усогласување на Закон за минимална плата. Согласно последните објави некаде околу 24.400“, вели Ангел Димитров.
Тој предлог беше дискутиран на последната седница на Економско-социјалниот совет и беше предложен и од синдикатите, но беше кажано и од страна на премиерот дека владата не прифаќа исплата на плати без придонеси и министерот за финансии претходно кажа дека Владата не го прифаќа тој предлог.
Од ССМ наредната недела на Претседателство и Совет ќе одлучуваат за следните чекори. Не ја исклучуваат можноста од излегување на улица како и минатиот пат кога се биеше битката за минималецот.
„Тоа што Сојузот на Синдикатите на Македонија го направи кога работодавачите во приватниот сектор вака одбиваа зголемување на платите, а најмногу кукаат за задржувањето на работниот кадар, квалификуван работен кадар во Македонија, без да ги платат нема ниту да го задржат и затоа сметаме дека тоа што можат да го направат е да ги зголемат платите на сите работници за најмалку 6.000 денари на кои би биле ослободени од плаќањето на придонесите од задолжително социјално осигурување. Доколку бидат безобразни ќе бидеме уште побезобразни“, вели Слободан Трендафилов.
Предлогот за 500 евра минималец, кој го прифатија и синдикатите дојде од Комората на Северо-Западна Македонија. Идејата беше да не се плаќаат придонесите на разликата од законското усогласување до сумата од 500 евра.
Владата ги остави сами да се договорат. Но, официјално не се изјасни дали ќе прифати „простување“ на разликата во придонесите. До крајот на месецов тоа ќе се дискутира на Економско – социјалниот совет.
„Во Министерството за финансии во наредниот период предмет на анализа од аспект на фискалните импликации врз буџетот и можностите за нивно реализирање ќе бидат сите предлози коишто ќе бидат официјално претставени пред Економско социјалниот совет на темата раст на минимална плата“, велат од МФ.
Само со законското усогласување на минимална плата, која би изнесувала под 400 евра, земјава останува со најнизок минималец во регионот. Според последните податоци од Сојузот на синдикати на Македонија, во моментов 25.000 работници земаат минимална плата која сега изнесува 22.500 денари.
ИЗВОР: ТВ 21
