Општина Тетово на нивната веб-страница и на социјалните мрежи го објави повикот за прибирање предлози за преименување на улици кои веќе имаат определено име и именување на новите улици. Јавниот повик ќе трае еден месец, од денеска до 10 март 2025 година.
– Се известуваат и се повикуваат сите граѓани, правни лица, претставници на невладини организации, здруженија на граѓани и граѓански активисти што ги претставуваат различните групи на граѓани на подрачјето на Општина Тетово, заради обезбедување инклузивност и вклучување на јавноста, да учествуваат со достава на предлози за преименување на улици во Општина Тетово, кои веќе имаат определено име и именување на новите улици, се вели во повикот.
Граѓаните своите предлози може да ги поднесат преку три начини. Едниот е пополнување на прашалникот по електронски пат, односно користење на линк до прашалник поставен на веб-страницата на Општина Тетово. Прашалникот може да се спушти во ПДФ формат и да се пополни па да се достави или преку пошта или лично во архивата на општината.
Неодамна градоначалникот на Тетово Касами изјави:
„Ние не може да бидеме заложници на едно време. Знаеме дека Македонија до ’90 години беше под Југославија и беше комунистички систем каде имаше други херои кои ги славевме. Сега сме во демократска држава. Сега имаме нов концепт со кој ги создаваме институциите и ја градиме државата. Тоа е европски и демократски концепт и тоа сигурно ќе се рефлектира и во имињата на улиците во градот Тетово. Тоа не е против никоја етничка група во градот. Тоа е во интерес на сите етнички групи, но мора да ја рефлектира реалноста, сегашноста и тоа што ние сакаме да го градиме во иднина“,
ИЗВОР: racin.mk
