Идејата за изградба на нов клинички центар е паузирана – во меѓувреме се планира Градската болница Осми септември да стане регионален центар за лекување на пациенти од Скопје, Велес и Куманово со што ќе се намалат гужвите на Клинички центар.
Првиот човек на Фондот за здравство вели дека од сите постоечки капацитети во Македонија, најблиску до стандарди за универзитетска клиника, има „8 Септември“.
„Морам да кажам дека во „8 Септември“ се изведуваат методи кои не се изведуваат на Клиника. Тука гледаме најмногу потенцијал, со најмало вложување да добиеме најдобар одговор.“ – Сашо Клековски директор на ФЗОМ.
Осми септември годинава е меѓу болниците која ќе добие поголем буџет од Фондот. Меѓу нив се и Клиниката за онкологија и клиниката за детски болести. Менаџментот на фондот со тоа очекува да не се јавува повторно недостиг од онколошка терапија, а на дестката клиника се планира намалување на возрасната граница на пациентите со цистична фиброза за примање на лекот Трикафта. Со зголемените буџети се најавуваат и нови методи на лекување.
Повеќе пари ќе има и за приватните здравствени установи. Од комората ма приватно здравство очекуваат со тоа да се подобри превенцијата кај населението и да се намалат трошоците за болничко лекување. Почетниот буџет на Фондот за здравство за годинава е 53,4 милијарди, за 7 милијарди поголем од ланскиот.
Но, како што се зголемуваат буџетите, Фондот најавува и зголемување на контролите. Директорот Клековски порача дека на директорите им е предочено дека зголемените буџети доаѓаат со зголемени очекувања и резултати од кои бенефит ќе имаат пациентите.
Извор: 24vesti.mk
