Пазарниот инспекторат најави засилени контроли низ целата држава за спречување на точење алкохол на малолетници, најавувајќи строги санкции за угостителите кои ќе бидат затекнати во прекршок. Казните достигнуваат до 4.000 евра, а во одредени случаи се изрекува и забрана за работа во период од еден месец.
Консумацијата на алкохол е најзастапена за време на викендите во ноќните клубови и баровите, каде често има млади под 18 години. И покрај законската забрана, често се случува да не се бараат лични карти, а малолетници слободно да купуваат алкохол.
Од Пазарниот инспекторат нагласуваат дека контролите ќе се спроведуваат со асистенција на полицијата, а угостителите се должни да ја проверат возраста на секој што нарачува алкохол.
Минатата година во Скопје и Битола беа спроведени акции во угостителски објекти, при што беа затекнати малолетници кои консумирале алкохол, а беа откриени и кривични дела поврзани со точење алкохол на малолетници.
Иако законите предвидуваат високи казни, реалноста покажува дека неретко тие не се почитуваат, а казнивоста е ниска. Инспекторите посочуваат дека контролните механизми се соочуваат со предизвици, бидејќи инспектор мора да биде присутен во моментот на продажбата за да може да се документира прекршокот.
Според податоците на Светска банка, во 2020 година Македонците во просек испиле 4,40 литри алкохол по глава на жител. Во Европската унија, во истиот период, потрошувачката на алкохол е намалена за 0,5 литри.
ИЗВОР: racin.mk
