Претседателот на СДСМ, Венко Филипче, во интервју за Радио Слободна Европа остро ја критикуваше актуелната состојба во здравствениот сектор, обвинувајќи ја Владата за неодговорно водење на здравствените политики.
„Здравствените политики се водат на крајно неодговорен начин. Постојат многу проблеми во системот. Колегите постојано укажуваат на тоа дека здравствениот систем не функционира како што треба“, изјави Филипче.
Тој истакна дека на чело на многу клиники се поставени директори кои немаат соодветно искуство, што дополнително го влошува функционирањето на системот.
„Директорите на клиниките често немаат никакво искуство во раководењето, ниту се стручни за позицијата. Има случаи кога директори, кои не работат на хируршки клиники и не извршуваат операции, се поставени на водечките функции, а исто така, има и такви кои се пишуваат за дополнителни дежурства, без да присуствуваат на истите“, изјави Филипче.
Тој предупреди дека хаосот во здравствениот сектор најмногу ги погодува пациентите, кои се соочуваат со долгите листи на чекање и недостигот на лекови.
„Листите на чекање се огромни, а нема лекови. Ова укажува на тотална незаинтересираност од страна на менаџментот и Министерството за здравство во управувањето со клиниките. Реверсниот систем, кој беше многу критикуван, всушност обезбедуваше лекови за пациентите“, нагласи Филипче, истакнувајќи дека последиците од нефункционирањето на системот се трагични.
„Цената која ја плаќаат пациентите се човечки животи, кои не можат да ја добијат потребната терапија навремено“, предупреди Филипче.
СДСМ бара од Владата и Министерството за здравство итна реакција за заштита на пациентите и спречување на поголеми штети во здравствениот систем.
ИЗВОР: racin.mk
