Дванаесетгодишниот Омер од кичевската населба „Прилепска“ бил нападнат од околу десет кучиња скитници, борејќи се со нив повеќе од 15 минути пред да биде спасен.
Во моментот на нападот, на местото на настанот бил зетот на Омер, кој му помогнал да се извлече. Детето сега се наоѓа под грижа на својата тетка и сестра, бидејќи неговите родители го напуштиле, објави ТВ 21.
Случајот е пријавен во полиција, а слични инциденти со агресивни кучиња скитници се пријавуваат речиси секојдневно.
Градоначалникот на Кичево, Фатмир Дехари, тврди дека бројот на кучињата скитници во градот е намален благодарение на преземените мерки.
„Апелирам до колегите градоначалници да не носат кучиња во Кичево. Работиме на третман и контрола, но проблемот бара долгорочно решение“, изјави Дехари.
По посетата на Омер, Дехари сподели фотографија со него, истакнувајќи дека прашањето со кучињата скитници останува предизвик за кој е потребен системски одговор.
ИЗВОР: racin.mk
