Со намалувањето на цените на комерцијалните станови во Битола, кои ги гради државата, започнува процесот на нормализирање на цените на пазарот на недвижности. Следен чекор во оваа стратегија ќе бидат Охрид и Скопје, каде ќе се понудат пониски цени од оние што моментално се достапни на пазарот, најави вицепремиерот и министер за транспорт Александар Николоски. Ова го истакна денеска на доделувањето на социјални станови во општина Кочани.
„Во следниот период ќе работиме на реализација на комерцијални станови. Јавноста веќе е запозната со одлуката на Владата, според која комерцијалната зграда што се гради во Битола ќе биде ставена на продажба по реални цени: 1000 евра за квадратен метар станбена површина, 500 евра за квадратен метар гаражен простор и 2000 евра за квадратен метар деловен простор. Со ова сакаме да влијаеме на екстремно високите цени на недвижностите, особено во големите општини. По Битола, вакви станови ќе градиме и во Охрид, а потоа ќе следува ваков повик и во Скопје, бидејќи многу млади брачни парови не можат да си дозволат да плаќаат 2000-2500 евра за квадратен метар“, изјави Николоски.
На настанот во Кочани, вицепремиерот Николоски заедно со премиерот Христијан Мицкоски и директорот на Јавното претпријатие за станбен и деловен простор, Марјан Стефановски, беа присутни на доделувањето на социјални станови на семејствата кои ги исполнуваат условите согласно јавниот повик.
„После неколку месеци успешна работа на новиот директор на ЈП и неговиот тим, веќе ги гледаме првите резултати. Во соработка со Министерството за транспорт, завршена е процедурата за распределба на социјални станови за ранливи категории граѓани во Кочани и Велес. Овие станови им се доделуваат на семејства кои навистина имаат потреба од нив, и се надевам дека ќе им донесат сигурност и топол дом. На сите нови станари им посакувам многу убави моменти во нивните нови домови“, нагласи Николоски.
Тој додаде дека инвестицијата за социјалната зграда изнесува 72 милиони денари и дека се работи на изградба на вакви станови и во Прилеп, Македонска Каменица и Бутел, Скопје.
ИЗВОР: ТВ 21
