Веселин Вујовиќ не штедеше комплименти за играта на хрватската репрезентација во полуфиналето против Франција и големата победа со која „коцкестите“ обезбедија финале на СП 2025.
„Секоја чест на Хрватите, кои играа против обложувачите, стручњаците, новинарите…. сите ја гледаат Франција како сикгурен финалист, но видовте што се случи на теренот. По чудото во финишот против Унгарија, Хрватите направија уште едно ракометно чудо и треба да им се честита за тоа“, изјави Вујовиќ.
Легендарниот тренер не пропушти да ги критикува Французите за чудната тактика што ја имаа во ова полуфинале.
„Французите самите си се виновни за она што им се случи. Играа одбрана 3-3, зона каква што играат селекции како Алжир и Кувајт… Против Хрватска, но и против останатите селекции од Балканот не можеш да дојдеш до позитивен резултат. Ние сме од старата ју-школа на ракометот, навикнати сме да пробиваме и зона од 5-1, а камоли 3-3. Па кој можеше да го чува Шипиќ еден на еден на голем простор“, прокоментира стручњакот што како селектор на Катар беше дел од овој ракометен мундијал.
Вујовиќ го критикуваше хрватскиот селектор Дагур Сигурдсон по претходните натпревари на „коцкестите“, но овојпат имаше само комплименти за тактиката на оваа селекција, особено за една важна работа во одбраната.
„Она што го видов во одбраната ме потсети на времето на Лино Червар, кога Вори играше напред во зоната 5-1. Сега Сигурдсон го направи истото со Мамиќ и беше големо изненадување. Така висок човек напред во одбраната, ги исфрли од ритам Французите во нападот во првото полувреме и изнуди многу грешки. Тоа беше маестрален потег на хрватскиот селектор, мило ми е и за самиот Мамиќ, кој со години работи напорно, а сега ја доби улогата на тивок херој“, истакна Веселин Вујовиќ.
Извор: kurir.mk
