Министерот за локална самоуправа Златко Перински, рече дека има амбиција да биде иден градоначалник на Скопје.
Тој во „Клик Плус“ на ТВ21 вечерва рече дека е убеден дека идниот градоначалник ќе биде од редовите на ВМРО-ДПМНЕ.
„Јавно ја искажав мојата амбиција за градоначалничкото место, но сепак, треба да му дадеме шанса на времето. Јас верувам дека предлогот кој ќе се даде од Мицкоски до извршните тела ќе биде најсодветното решение, и убеден сум дека тој предлог ќе биде идниот градоначалник на Скопје. Уживам во она што го работам, се трудам да го дадам максимумот, но сигурно дека градоначалничкото столче би ми било голем предизвик“, рече Перински.
Перински кажа дека има многу визии за главниот град.
„Имам многу визии за Скопје, ако почнеме ќе ни требаат три емисии, но Скопје го зафати едно сивило и одамна немам видено насмеани лица“, рече Перински.
Министерот дополни дека на Скопје не му се доволни четири години планирање за да се среди, туку за стратегија за идните 20 години.
На крајот од емисијата Перински објасни зошто Скопје не може да има трамвај.
„Тешко може да се направи трамвај, бидејќи е безплански развивано во централното градско подрачје. Но, има и многу други фактори“, изјави Перински.
ИЗВОР: ТВ 21
