Опозицијата обвинува дека власта врши партизација на дипломатската мрежа, наспроти најавената професионализација. Ова следува откако премиерот Христијан Мицкоски потврди дека докторот Игор Николов, кој бил функционер на ВМРО-ДПМНЕ, ќе биде испратен за амбасадор во Франција.
„Првиот предлог којшто вчера беше соопштен доаѓа како предлог којшто е цврсто партиско решение.“, порача Оливер Спасовски.
Владата на седница одлучила да предложи четворица амбасадори, но и да отповика девет актуелни. Ова е овозможено откако пред еден месец Собранието усвои автентични толкувања на Законот за надворешни работи. Со нив, отсега Владата ќе може да ги отповикува амбасадорите кои пред да бидат испратени не го поминале собранискиот филтер, што се сметаше дека не е задолжителен чекор во процедурата.
„Не може Уставот да биде дерогиран ниту со едно автентично толкување на некакво законско решение… така што се знае дека амбасадорите ги назначува и отповикува претседателот на државата.“, вели Оливер Спасовски.
Спикерот Африм Гаши не гледа ништо спорно.
„Не се сложувам, не го делам тоа мислење, но сепак треба да знаете дека тоа што во Собранието го носи мнозинството на пратеници, тоа е волјата на граѓаните.“, вели Африм Гаши.
На владината седница за амбасадор во Украина е предложен Димитар Блажевски, за амбасадор во Јапонија, Андријана Цветковиќ и за амбасадор во Хрватска, Драган Ѓурчевски. Меѓу отповиканите се амбасадорката во Бугарија, Агнеза Руси-Поповска, Зеќир Рамчиловиќ од Црна Гора, Џенк Сејфула од Шведска, како и амбасадорите од Чешка, Велика Британија, Босна и Херцеговина и од мисијата во Советот на Европа.
ОТПОВИКАНИ АМБАСАДОРИ:
Агнеза Руси-Поповска – амбасадорка во Бугарија
Зеќир Рамчиловиќ – амбасадор во Црна Гора
Методија Белевски – амбасадор во Белгија
Светлана Гелева – амбасадорка и постојана претставничка при Советот на Европа
Пајо Авировиќ – амбасадор и шеф на Постојаната мисија при Меѓународните организации
Јакуп Реџепи – амбасадор во Босна и Херцеговина
Емил Крстевски – амбасадор во Чешка
Џенк Сејфула – амбасадор во Шведска
Катерина Ставревска – амбасадор во Обединетото Кралство
ИЗВОР: ТВ 21
