Директорката на Комисијата за односи со верските заедници и религиозни групи (КОВЗРГ) Оливера Трајковска испрати телеграма со сочувство до Светиот архиерејски синод на Православната црква на Република Албанија, до свештенстовото и до православните верници по повод упокојувањето на архиепископот на Тирана, Драч и на цела Албанија, г. Анастасиј (Јанулатос).
-Дозволете ми од името на македонските граѓани и од мое лично име како директор на македонската Комисија за односи со верските заедници и религиозни групи да го изразиме нашето сочувство со Албанската православна црква и албанскиот православен народ поради упокоението на нејзиниот Поглавар, г. Анастасиј (Јанулатос), Архиепископ на Тирана, Драч и на цела Албанија, наведува Трајковска.
Според неа, Албанската помесна црква овие денови се соочува со загуба од натчовечки размери.
-Изразувам длабоко сочувство до Вас и со нажалено срце станувам дел од Вашите молитви.Смртта на неговото Блаженство архиепископот Анастасиј е загуба на еден духовен татко на една Помесна црква, загуба на еден народ, загуба на целата Вселенска црква. Блаженоупокоениот архиепископ чија што евангелска дејност беше препознаена, посведочена и афирмирана од цела православна и христијанска екумена, го красеше одлика на вистинска човечност, пожртвуваност и умносрдечност. Бог да му подари Царство небесно на новопретставениот архиепископ г. Анастасиј, а споменот на земјата да му биде вечен, пишува Трајковска во телеграмата.
ИЗВОР: kurir.mk
