БОГОТА (АА) – Колумбискиот претседател Густаво Петро денес ја спореди депортацијата на нерегуларните мигранти од Соединетите Американски Држави (САД) со транспортот на луѓето во нацистичките концентрациони логори за време на Втората светска војна, јавува Анадолу.
Говорејќи на инаугурацијата на новата министерка за надворешни работи Лаура Сарабија, Петро се осврна на неодамнешниот дипломатски спор со САД.
„Од епизодата со Трамп… има низа лекции што треба да се извлечат, од нив и од нас. Од нив, претпоставувам, дека не мора со лисици да ги вадат луѓето што сакаат да ги изнесат од нивната земја. Ќе има политичка дискусија, на пример, ако не ја повторат грешката на Германците во 1943 година бидејќи тие ги користеа возовите и железничките пруги за да однесат цели вагони полни со Евреи, социјалисти и комунистите во концентрационите логори.“
Изјавата на Петро доаѓа по период на дипломатски тензии предизвикани од одбивањето на колумбиската Влада да прифати депортирани лица со американски воени авиони, наведувајќи ја загриженоста за „достоинствен третман“ на мигрантите. Одбивањето предизвика силна реакција на американскиот претседател Доналд Трамп и размена на закани за тарифите.
Оттогаш Колумбија организираше три лета на Колумбиските воздухопловни сили, кои пристигнаа вчера и денес, превезувајќи 306 колумбиски државјани, меѓу кои 42 малолетни, според Петро.
„Дали господин Трамп ќе им каже на 42 колумбиски деца дека се криминалци?“, праша Петро. „На ист начин како што им кажа на 42 деца и на стотици илјади ќе им каже дека се криминалци, така мислеа и во 1943 година.“
„Секој што е Латиноамериканец, од автохтони народи, црнец, ќе биде третиран како криминалец. Тоа се нарекува колективизирање на криминалот; тоа го измисли Хитлер“, додаде тој.
Извор: Anadolu Agency (AA)
