Ким Новак, холивудска дива од 1950-тите и 1960-тите, која глумеше во филмот „Вртоглавица“ на Алфред Хичкок, ќе добие Златен лав за животно дело на 82. издание на Венецискиот филмски фестивал, соопштија организаторите. Фестивалот ќе се одржи од 27 август до 6 септември.
Позната по својата главна улога во психолошкиот трилер од 1958, Новак имаше и значајни улоги во класици како што се „Пикник“ и „Човекот со златна рака“.
„На 92-годишната актерка ќе ѝ биде доделен Златен лав за ‘ненамерно станување филмска легенда’“, изјави уметничкиот директор на фестивалот, Алберто Барбера.
„Ким Новак беше една од омилените икони на цела ера на холивудските филмови, од нејзиното деби во средината на 1950-тите, па сè до нејзиниот предвремен и доброволен егзил од позлатениот кафез на Лос Анџелес“, рече Барбера, нарекувајќи ја независна и неконформистичка.
Документарецот „Вртоглавицата на Ким Новак“ од швајцарско-американскиот филмски режисер Александар Филип, направен во соработка со актерката, ќе биде премиерно прикажан на фестивалот.
„Навистина сум трогната што ја добив престижната награда Златен лав од толку значаен филмски фестивал. Да бидам призната за мојата работа во овој период од мојот живот е остварување на сон“, рече Новак.
Германскиот режисер Вернер Херцог исто така ќе добие Златен лав за животно дело.
Официјалната селекција на филмови во трка за Златен лав треба да биде објавена во јули.
ИЗВОР: sdk.mk
