Иако поминаа три дена, трагите од крв се уште стојат на влезот на скопско Шуто Оризари. Во текот на полициска акција во раните утрински часови во саботата, 28 годишно момче се нашло во погрешно време на погрешно место. Оштетениот А.М. вели дека поради викотниците кои ги слушнал излегол да види што се случува во неговата населба. Според него, кога стигнал таму, го фатиле двајца полициајци во униформа со маска и еден во цивилка, кои брутално го истепале и потоа му рекле да се врати дома.
-Ми рекоа да легнам на земја, легнав и ги кренав рацете. Едниот ми ја стави ногата на врат, ми ги држеа рацете и почнаа да ме напаѓаат по глава двајцата кои беа со маски. Им реков дека тука живеам, во оваа куќа. Кога ме кренаа му го видов лицето на цивилниот полицаец и ми рекоа да одам дома и потоа ќе дојде полиција. Им реков како да одам, крвавам целиот. Тие отидоа натаму кон населбата спроти, од другата страна, каде беше полициската акција, изјави А.М. граѓанин кој го пријави случајот.
Неговата мајка за ТВ21 раскажа како трчала по синот да го спаси од рацете на овие полицајци. Таа вели дека не и било дозволено ни брза помош да дојде. Еден час по инцидентот, мајката вели дека Брзата помош пристигнала, но не напишале извештај дека синот е истепан од службено лице, како што рекла во изјавата. Таа вели дека утредента случајот го пријавила во полициската станица во Бутел, но од таму не добила полициски записник дека е документиран случајот.
-Ми велат, госпоѓо однесете го сама во болница! Му кажувам како да го однесам до Брза помош кога целата улица е со полиција. Да одиме пак да не тепаат? Ќе го пратам детето во оган! Му велам да повика брза помош бидејќи момчето крвари. Како што се приближив, ја видов капата врз него, а како што се приближив, видов крв на земјата и сфатив дека мора да имаме факти за да го докажеме тоа. За овие случаи кои се во судовите и во полиција, треба да имаме многу факти за докажување, бидејќи понекогаш знаат и да ги сокријат, изјави мајката на оштетениот.
Побаравме одговор и од МВР. Случајот не е документиран во полицискиот билтен. Но, во соопштението на МВР се наведува дека акцијата спроведена од 18 до 19 јануари на 21 локација во Скопје и Гевгелија, резултирала со претрес на 16 лица осомничени за шверц на дрога во бандата Раде Трајковски-Штекли. Членовите на семејството бараат правда, најавувајќи дека ќе го тужат МВР за употреба на прекумерна сила без никаков сомнеж или вина врз нивниот 28-годишен син за кој велат дека претрпел здравствени последици.
ИЗВОР: ТВ 21
