Визбегово, една од најголемите населби на општина Бутел, денес е пример за посветеноста и добрата работа на градоначалникот на општината, Дарко Костовски. Жителите Албанци од оваа населба велат дека се задоволни и го ценат дадениот збор и посветеноста на Костовски да ги исполни ветувањата, за разлика од двете претходни партии кои беа дел од власта, ДУИ и СДСМ.
За време на престојот меѓу жителите на Визбегово, градоначалникот Костовски истакна дека „дадениот збор има тежина на планина“ и дека неговите заложби се реалност, а не само празни ветувања. Тој рече дека пред неколку месеци ветил изградба на патот што води до влезот на ОУ „Визбегово“ и оваа заложба ја извршува како важен дел од неговите напори за подобрување на условите за живот на жителите на оваа населба.
Според него, ДУИ и СДСМ, и покрај тоа што долги години ја воделе централната и локалната власт, не реализирале никаква позначајна инвестиција за Визбегово. Жителите, како што рече Костовски, се задоволни што веќе имаат градоначалник кој стои на зборот и кој реализира конкретни проекти за подобрување на секојдневниот живот.
„Задоволните лица во Визбегово се печат за добро сработената работа! Дадениот збор планина тежи! Денеска бев во Визбегово, дадов збор пред извесен период дека ќе ја направам пристапната улица до основно училиште кое се изгради во време додека сум јас градоначалник, зборот беше испочитуван. Денеска заедно со задоволните жители на Визбегово, чичко Раман, Нешат, Али и останатите договоривме и нови важни приоритети. Дадениот збор мора да се испочитува. Морам да истакнам дека ДУИ И СДС 20 години наназад иако беа централна и локална власт, камен на камен не поставија во ова населено место, затоа жителите се евидентно задоволни кога некој не ги лаже, кога некој цврсто стои на зборот! Рамномерен развој за општина Бутел, модерна општина Бутел! “ напиша Костовски на својот официјален Фејсбук профил.
Жителите на Визбегово кои излегоа да го пречекаат градоначалникот на општина Бутел, Дарко Костовски пред камерите, порачаа дека заложбата на градоначалникот со цел еднаков развој и модернизација на општина Бутел е важен чекор за сите граѓани, без разлика на националноста.
На крајот од оваа посета, Костовски им порача на жителите на Визбегово дека ќе продолжи работата, посветено и транспарентно, со цел секој жител на општина Бутел да има можност за подобар и подостоинствен живот.
