АНКАРА (АА) – Најмалку 18.342 лица загинаа, а 74.242 се повредени по двата силни земјотреси кои во понеделникот ги потресоа јужните делови на Туркије, а кои се окарактеризирани како „катастрофа на столетието“, потврди турската Агенција за управување со катастрофи и вонредни состојби (АФАД), известува Анадолу.
Два разорни земјотреси со интензитет од 7,7 и 7,6 степени по Рихтер, во понеделникот ги потресоа јужните делови на Туркије со епицентар во Кахраманмараш, а бројни спасувачки екипи и понатаму посветено работат на акциите за претрага и спасување на луѓето заробени под урнатините на зградите.
Агенцијата за управување со катастрофи и вонредни состојби (АФАД) објави дека во моментов на терен работат повеќе од 120.000 спасувачи и трагачи.
„Над 70.000 луѓе се евакуирани од регионите погодени од земјотресите“, соопшти АФАД.
Покрај спасувачките тимови, во погодените подрачја се испратени и шатори, ќебиња, храна и тимови за психолошка поддршка.
„Над 97.970 семејни шатори се поставени за сместување на преживеаните“, објави АФАД.
Екипите на терен деноноќно работат веќе петти ден за да спасат што е можно повеќе луѓе кои се заробени под урнатините по разорните земјотреси кои ги потресоа јужните делови на Туркије во понеделникот.
Шефот на турската дипломатија, Мевлут Чавушоглу, претходно рече дека 95 земји и 16 меѓународни организации ѝ понудиле помош на Туркије, а многу земји испраќаат тимови за претрага и спасување, лекари, мобилни болници и материјали за помош во регионите погодени од земјотресите.
Зборувајќи во Анкара, главниот град на Туркије, Чавушоглу информира дека во подрачјата погодени од земјотресите се наоѓаат 6.479 луѓе од 56 земји.
Извор: www.aa.com.tr
