Над 350 дечиња ќе ги одмерат спортските сили во рамки на училишните спортски лиги кои стартуваа денеска во салата на ООУ „Тихомир Милошевски“, проект финансиран од општина Ѓорче Петров.
Учество земаа ученици од сите шест општински училишта кои ќе се натпреваруваат во повеќе спортови, но и во забавен и рекреативен спорт. Во спортските активности се вклучија и наставниците од предметна и одделенска настава.
– Спортот е одличен за ран психо-физички развој кај децата. На долг рок, тоа ќе донесе здрави генерации, научени на дисциплина, тимска игра, и најважно, генерации што ќе знаат да делат победа, но и да поднесат пораз. Затоа што, животот носи многу победи, но и порази, и многу е важно да знаеме да се носиме со нив, порача денеска градоначалникот на Ѓорче Александар Стојкоски.
Во таа насока, општина Ѓорче Петров и во иднина ќе го поддржува спортот со многу повеќе средства, но и со инфраструктурни чекори кои ќе донесат подобрување на условите за спортување, рече тој посакувајќи им спортска среќа и успеси на сите учесници.
ИЗВОР: skopjeinfo.mk
