Во Друштвото на писатели на Македонија, во Скопје, на 9 мај, во 12,00 часот, ќе биде промовирана новата поетска збирка на авторката Оливера Доцевска „Per Aspera Ad Astra “, во издание на Центарот за култура и културолошки студии (ЦККС) од Скопје. За поезијата на Доцевска ќе зборува м-р Ирена Јурчева.
Книгата е зборник на необјавени песни на поетесата Оливера Доцевска, песни кои низ душевната призма на авторката ги рефлектираат изминатите години и општествениот и личниот пат, проткаен со животите на другиот, прикажување на смислата во бесмислата и на губењето низ себепронаоѓањето, низ силата на мислата и на зборот во одбраниот пат и правец.
Авторката Оливера Доцевска е родена во Куманово, Република Македонија. Дипломирала и магистрирала на Правниот факултет во Скопје при Универзитетот „Св. Кирил и Методиј“, а во Скопје положува и правосуден испит и работи како адвокат од 2008 г. до 2020 г.
Оливера Доцевска денес работи и живее во Белград, Република Србија.
Од 2012 година член е на Друштво на писатели на Македонија, а од 2014 – 2018 година е претседател на Статутарна комисија на ДПМ, воедно и член на Собраниски одбор на ДПМ.
Нејзиното книжевно творештво опфаќа повеќе дела поезија и проза, меѓу другото 8 стихозбирки, 3 приредени антологии, како и проза колумни, есеи, преводи, а преведена е на повеќе јазици и добитник на неколку награди за поезија.
Republika.mk – содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
ИЗВОР: republika.mk
