Она што побарале родителите на децата од пониските одделенија е посетата на психотерапевтот да биде во рамките на нивната одделенска заедница
Директорот на белградската училишна управа, Драган Филиповиќ, денеска изјави дека, иако е одлучено учениците од основното училиште „Владислав Рибникар“, каде што се случи трагедијата на 3 мај, да се вратат на настава в среда, на 10 мај, враќањето на секој ученик ќе зависи од тоа како ќе се чувствува и додаде дека сите наредни активности во тоа училиште ќе бидат целосно приспособени на учениците.
Филиповиќ рече и дека барањата на родители на основци во „Владислав Рибникар“ главно се однесуваат на префрлање на учениците и реконструкција на училиштето.
„Секој што влегува во училиштето има чувство дека треба да се реконструира. Инаку, училиштето долго време е во состојба која бара реконструкција. Кога станува збор за префрлање ученици, тоа не би било добро за децата. Повторно, во друго училиште, со врсниците би ги поминувале истите приказни, би се навраќале на тоа како се случило, зошто се случило, како изгледало… Децата би немале можност да завршат со тоа што се случило. Секако дека не е лесно, но токму затоа организираме за сите деца во ова училиште се што им треба“,
изјави Филиповиќ, пренесува Телегарф.рс.
Тој посочи дека наставата нема да се одвива по класичен модел и дека е донесен акциски план.
„Учениците ќе се вратат на настава в среда на 10 мај, но враќањето на секој ученик ќе зависи од тоа како се чувствува“,
рече тој и додаде дека сите наредни активности во тоа училиште ќе бидат целосно приспособени на учениците.
Она што побарале родителите на децата од пониските одделенија е посетата на психотерапевтот да биде во рамките на нивната одделенска заедница.
„Ние, исто така, го препорачавме тоа бидејќи децата во група најдобро добиваат информации и се осмелуваат да постават прашања. Особено кога станува збор за деца од најмала возраст“,
изјави Филиповиќ.
За потсетување, во пукањето во основното училиште „Владислав Рибникар“ загинаа осум ученици и чуварот. Во станот на ученикот К.К. (13), кој е обвинет за ова грозоморно злосторство, полицијата пронашла скица и имиња на 16 деца кои планирал да ги убие.
По трагедијата, српскиот министер за образование Бранко Ружиќ вчера поднесе неотповиклива оставка од функцијата.
Во писмото до премиерката Ана Брнабиќ, тој наведува дека оставката е личен, но и политички чин. Во развиените демократски општества, вели тој, тоа е сила, а во нашиот регион често е одлика на слабост. Но, додава, јавноста нека суди.
Извор: 360stepeni.mk
