Тој ќе остане запаметен како престолонаследник кој најдолго чекаше за да дојде на тронот со оглед дека неговата мајка Елизабета беше на чело на британската монархија 70 години
Во Вестминстерската опатија започна церемонијата на крунисување на британскиот крал Чарлс Трети околу 11 часот по локално време и се очекува да трае околу два часа.
Пред пристигнувањето на кралот, во Опатијата пристигнаа членовите на кралското семејство, меѓу кои и неговиот син, принцот Хари, кој во Лондон допатува без сопругата Меган Маркл.
Постариот син Вилијам, со сопругата Кејт Мидлтон, влезе како претходница на кралот и кралицата Камила.
Круната на свети Едвард, која се користи само еднаш во текот на владеењето на еден крал, денеска ќе биде ставена на главата на Чарлс Трети со извикување: „Бог да го чува кралот“.
Чарлс седна во кралскиот стол на Едвард и со него го има владетелскиот жезол кој симболизира контрола над британската нација.
На церемонијата на крунисување присуствуваат околу 2 300 гости, меѓу кои 100-ина шефови на држави, освен оние од Русија, Белорусија, Северна Кореја и Никарагва.
Покрај Чарлс Трети се наоѓа неговата сопруга Камила која од денеска официјално ќе биде кралица. Чарлс Трети, пак, ќе стане 40. монарх кој е крунисан во Вестминстерската опатија од 1066 година. Тој ќе остане запаметен како престолонаследник кој најдолго чекаше за да дојде на тронот со оглед дека неговата мајка Елизабета, беше на чело на британската монархија 70 години.
Извор: 360stepeni.mk
