Со заклетвите денеска, основните обвинителства во земјава ќе добијат 18 нови обвинители. Нив Советот ги избра на седница на 23 мај откако претходно распиша огласи со цел да се примаат сите 28 обвинители од последната генерација на Академијата.Меѓутоа, 10 од нив не се пријавија и ќе чекаат втора шанса на нови огласи што ќе ги распише Советот
Изјавувам и се колнам дека во вршење на функцијата јавен обвинител ќе го почитувам Уставот на Република Северна Македонија, законите и меѓународните договори ратификувана согласно Уставот, дека функцијата ќе ја вршам совесно, непристрасно и одговорно и дека ќе ги заштитувам слободите и правата на човекот и граѓанинот и интересите на другите правни субјекти.
Ваквата заклетва утрово, облечени во тога, во Советот на јавни обвинители дадоа 10 нови обвинители од последната генерација што ја заврши Академијата за судии и јавни обвинители.
Меѓу нив беше и Барлет Џафери, синот на претседателот на Собранието, Талат Џафери, кој беше во фокусот на јавноста откако Државната комисија за спречување корупција обелодени дека тој е еден од многуте студенти кој своевремено полагал правосуден испит пред да дипломира. Веднаш до него седеше и нрговата колешка Албулена Абази која е сопруга на шефот на ОЈО ГОКК, Ислам Абази.
Џафери ќе биде обвините во Гостивар, Абази во Кичево.
Претседателот на Советот, Антонио Јолевски, пред кого се заколнаа, им посака среќа иним рече да ги слушаат и да учат од постарите колеги во обвинителствата каде што ќе работат, а им кажа и дека тие може да ги научат нешто постарите колегите особено во областа на меѓународните ратификувани договори и спроведување на пресудите од Стразбур.
Ова беше и нивна прва средба како обвинители со медиумите, па кога новинарите побараа некој од нив да даде изјава, првично никој не се „охрабри”. По првичниот грч, двајца од нив застанаа пред камерите.
Александра Станковска е нова обвинителка во ОЈО Велес, рече дека се одлучила за професијата бидејќи ја сака кривичната материја и затоа што јавните обвинители се штитеници на јавниот интерес и се први кои се повикани да го гонат криминалот.
Нејзиниот колега Емрах Михтароски, пак, е нов обвинител во ОЈО Кичево и рече дека мотивот му е да придонесе во унапредување на состојбите во обвинителството и, како и неговата колешка од Велес, да придонесе за враќање на довербата во правосудството.
По првата, заклетва даде и втората група со што основните обвинителства во земјава од денеска и формално имаат 18 нови обвинители.
Тие се распоредени во:
- ОЈО Битола: Борче Коруновски и Марија Чурлиновска;
- ОЈО Велес: Александра Станковска;
- ОЈО Гостивар: Илир Јакупи, Барлет Џафери и Александра Димоска;
- ОЈО Дебар: Анита Граждани Пачуку;
- ОЈО Делчево: Сузана Бошнаковска;
- ОЈО Кичево: Албулена Абази и Емрах Михтароски;
- ОЈО Куманово: Самир Акифи;
- ОЈО Охрид: Кристина Илиеска Атанасова;
- ОЈО Прилеп: Стевчо Биновски;
- ОЈО Свети Николе: Дарко Цветановски;
- ОЈО Струга: Ермира Муса-Нура;
- ОЈО Тетово: Илир Абдурахмани, Нина Димитриеска и Јетмир Беџети.
Новите обвинители Советот ги избра на седница на 23 мај откако претходно распиша огласи со цел да се примаат сите 28 обвинители од последната генерација на Академијата. Меѓутоа, 10 од нив не се пријавија и ќе чекаат втора шанса на нови огласи што ќе ги распише Советот.
Со новите обвинители, Академијата ја завршија и 30 кандидати за судии за кои Судскиот совет исто така распиша оглас.
ИЗВОР: 360stepeni.mk
