Вештакот за „Ласкарци“ не оздраве за денешното рочиште

За одложувањето на рочиштето странките веќе беа известени, па денеска во судот се појавија само новинарите

Станува збор за вештакот Зеќирија Зеќири, кого обвинителот од ОЈО Скопје, Дарко Јакимовски, го избра да одговара на неговите прашања. Тој го испитуваше на две претходни рочишта и на минатото требаше да премине, како што најави, кон финалните поенти со прашањата. Јакимовски тогаш не се согласи да испитува некој од другите вештаци од тимот

Вештакот Зеќирија Зеќири, кој е дел од тимот на четворица инженери што го направија машинското супервештачење за автобуската несреќа кај Ласкарци, не оздрави, па и денешното судското рочиште нема да се одржи.

За одложувањето странките веќе беа известени, па денеска во судот се појавија само новинарите.

Вештакот Зеќирија, без да најави, не се појави на рочиштето пред два дена, а неговите колеги од тимот го известија судот дека има нарушена здравствена состојба и дека за тој ден имал упат за болнички испитувања.

Судијката Дијана Груевска-Илиевска тогаш најави дека ќе бара писмени докази, односно да медицинска документација за да го оправда отсуството.

Станува збор за вештак кој обвинителот од ОЈО Скопје, Дарко Јакимовски, го избра да одговара на неговите прашања. Тој го испитуваше на две претходни рочишта и на минатото требаше да премине, како што најави, кон финалните поенти со прашањата. Јакимовски тогаш не се согласи да испитува некој од другите вештаци од тимот.

„Никогаш не сум бил причина за одолговлекување и одложување на рочиште. Меѓутоа, коректно е тој лично да ве извести како суд. Имам основана причина да се сомневам дека ова е договорена работа, другите вештаци да се тука, а тој да не е тука“,

рече обвинителот Јакимовски на рочиштето пред два дена.

Судијката тогаш посочи дека ќе се почека вештакот да оздрави и дека доколку тоа не се случи до денеска, ќе се одложи и денешното рочиштето. Меѓутоа, доколку и на следното рочиште наредната недела тој не се појави, судењето ќе продолжи со испитување на некој друг од тимот вештаци.

Автобуската несреќа за која се однесува овој судски процес се случи на 13 февруари 2019 година и во неа загинаа 16 патници, а 37 беа повредени. Во попладневните часови кобниот ден, автобус на компанијата „Дурмо турс“ излета од автопатот во близина на селото Ласкарци возејќи на редовна линија од Скопје кон Гостивар.

Обвинети во овој судски процес се шест лица: возачот Маноил Трифуновски, сопственикот на „Дурмо турс“ Дурмиш Белули и одговорниот за транспорт во фирмата, Ремзи Мифтари, како и тројца вработени во станицата за технички преглед. Првите тројца се товарат за сторени тешки дела против безбедноста на луѓето и имотот во сообраќајот, додека останатите за соучество во истото дело.

ПОВРЗАНИ ВЕСТИ:

Тензично рочиште за „Ласкарци“: Супервештачењето нарачано од судот ја префрла вината кај возачот

Супервештачењето за „Ласкарци“ за обвинителот занемарило важни докази, за оштетените е пропаднат обид да одговара само возачот

Сите за правично судење“: Тимското испитување на супервештаците за „Ласкарци“ е спротивно на ЗКП