АНКАРА (АА) – Универзитетот во Анкара (АУ) му додели на претседателот на Црна Гора, Јаков Милатовиќ, почесен докторат во областа на економијата, јавува Анадолу.
Во Ректоратот на Универзитетот се одржа свеченото доделување на почесниот докторат на Милатовиќ, кој престојува во официјална посета на Анкара.
Деканот на Факултетот за политички науки, проф. д-р Орхан Челик, рече дека Сенатот на Универзитетот во Анкара одлучил да му додели почесен докторат на претседателот Милатовиќ, кој потоа му го врачи ректорот проф. д-р Неџдет Унувар.
Црногорскиот претседател Милатовиќ во своето обраќање изрази благодарност за почесниот докторат и порача дека дипломатските врски воспоставени пред 145 години претставуваат важна основа во развојот на билатералните односи меѓу Црна Гора и Туркије.
„Соработката, особено во областа на науката и образованието, ја гледам како област на која треба да ѝ се даде посебен акцент во контекст на нашите земји и верувам дека токму вашиот универзитет во оваа област ќе има незаменлива улога“, рече Милатовиќ.
Тој истакна дека титулата почесен доктор на науки ја доживува како особена чест и задоволство за сето она што досега го има направено во својата професионална кариера и што планира да направи во иднина.
„Денешниот настан е уште една симболична потврда за заемното почитување меѓу Црна Гора и Република Туркије. Горд сум што со овој значаен гест ќе го запишам моето име во историјата на вашиот универзитет и што сум дел од вашето образовно и истражувачко семејство. Ви посакувам да постигнете одличен успех во наредните години и успешно да ја продолжите мисијата за ширење на знаењето за доброто на вашата земја и народ, како и на сите луѓе што доаѓаат од странство да студираат на вашиот универзитет“, рече Милатовиќ.
Ректорот Унувар истакна дека двете држави имаат длабоко вкоренети и силни односи и дека Црна Гора отсекогаш важела за пријателска балканска земја.
Тој додаде дека двете држави со години ја зајакнуваат соработката во областа на образованието.
„Помеѓу 1992 и 2023 година околу 420 студенти од Црна Гора добија стипендии во Туркије. Во моментов, благодарение на овие стипендии, во нашата земја студираат околу 70 студенти“, рече ректорот.
На свеченоста присуствуваше и Милена Милатовиќ, сопруга на црногорскиот претседател Јаков Милатовиќ.
Милатовиќ денес во Анкара ќе се сретне со турскиот претседател Реџеп Таип Ердоган, а по средбата ќе се одржи и заедничка прес-конференција.
Извор: Anadolu Agency (AA)
