Холандскиот универзитет „Кодартс“ и македонскиот „Гоце Делчев“ се годинашни добитници на наградата Менада за поддршка на современиот танц, која ја доделува Бордот на Танц фест Скопје. Годинава ја добиваат, како што вели уметничката директорка Рисима Рисимкин, „Кодартс“ од Ротердам, со кој Интерарт културниот центар соработува 15 години и со чија поддршка е основана првата едукативна програма за современ танц на универзитетско ниво во земјава и на Универзитетот „Гоце Делчев“ во Штип на кој во 2017 година се вдоми Катедрата за современ танц.
„Сметаме дека е исклучително значајна работата на двата универзитета, нивниот сенс и однос кон современата култура, со посебен акцент на квалитетот на наставата, извонредната продукциска програма која им ја овозможуваат на студентите“, се вели во образложението на Бордот.
Академијата за современ танц при универзитетот Кодартс во 2008 година потпиша Меморандум за соработка со културниот центар Интерарт и Рисимкин, со што во 2010 започна со работа Скопје танцовата академија, прва образовна програма на универзитетско ниво за современ танц во земјава. Оваа соработка, во која „Кодарст“ за првпат во својата историја, долга преку 80 години постоење, дозволи споделување на наставните програми на универзитетот, беше поддржана од Амбасадата на Кралството Холандија во Скопје.
Според Бордот, Универзитетот „Гоце Делчев“ покажа исклучително чувство за уметничките современи форми и даде своја поддршка за развојот на современиот танц во земјава, преку оформување на Катедрата за современ танц на Филмската академија, програма која беше поставена во соработка со Холандија. Воедно, во заеднички заложби со професорката Рисимкин, се обезбедија и просторни услови и катедрата работи во просториите на Домот на АРМ во Скопје, со што се заокружува формирањето на оваа програма.
Наградите ќе се доделат на 4 април, во 20 часот, на сцената на Македонскиот народен театар (МНТ), на свеченото отворање на фестивалот. Ќе се изведе претставата на Кодартс танцовата компанија „Таленти во движење“ , во чест на 30 години дипломатски односи со Холандија.
Б. НЕСТОРОСКА
