Кулеба детално го информира специјалниот пратеник на кинеската влада за принципите на обновување на одржливиот и праведен мир заснован на почитување на суверенитетот и територијалниот интегритет на Украина, соопшти украинското МНР
Украина нема да прифати никакви предлози за завршување на војната со Русија, што би вклучило губење територии или замрзнување на конфликтот, му порачал министерот за надворешни работи на Украина, Дмитриј Кулеба, на специјалниот претставник на Кина за евроазиски прашања и поранешен амбасадор во Русија, Ли Хуи, кој е во посета на Киев, соопшти украинското Министерство за надворешни работи.
Тоа е прва посета на Киев на висок претставник на Кина која има сè посилни врски со Москва од почетокот на руската инвазија на Украина во февруари 2022 година.
„Кулеба детално го информираше специјалниот пратеник на кинеската влада за принципите на обновување на одржливиот и праведен мир заснован на почитување на суверенитетот и територијалниот интегритет на Украина. Тој истакна дека Украина не прифатила никакви предлози кои вклучуваат губење на територија или замрзнување на конфликтот“,
соопшти украинското МНР.
Се очекува кинескиот претставник да разговара и со официјални претставници во Русија, Полска, Франција и Германија.
Кина се воздржува од осуда на Москва и не зборува за „инвазија“, предизвикувајќи критики од европските земји и САД кои го доведуваат во прашање кредибилитетот на Кина како потенцијален посредник меѓу завојуваните страни.
Извор: 360stepeni.mk
