ХАТАЈ (АА) – Петчлено семејство е спасено од под урнатините на срушена петкатница во Искендерун во областа Хатај, 80 часа по земјотресите кои во понеделникот ги потресоа јужните делови на Туркије, јавува Анадолу.
Припадници на спасувачките тимови, вложувајќи големи напори, успеаја од под урнатините прво да ја извлечат мајката Вефа Абурас од Сирија, а потоа нејзините деца Зехра (12), Ахмет (9) и Васим (6) и нејзиниот сопруг Хасан.
Членовите на петчленото семејство, дочекани со аплауз од насобраните, на носилки се префрлени до возилата на Итната помош и транспортирани до болница.
„Најмалку 14.351 лице загинаа, а 63.794 се повредени во двата силни земјотреси што во понеделникот ја потресоа јужна Туркије“, изјави денеска турскиот потпретседател Фуат Октај.
Земјотресите со јачина од 7,7 и 7,6 степени, со епицентар во турската област Кахраманмараш, ги почувствуваа 13 милиони луѓе во 10 турски области, Адана, Адијаман, Дијарбакир, Газиантеп, Хатај, Килис, Малатија, Османије и Шанлиурфа.
Извор: www.aa.com.tr
