Од партијата додаваат дека овој Божиќ ќе остане запаметен како ден кога Србите повикале на мир, но и ден кога се пролеала невина српска крв
Политичката партија на српското малцинство во Косово, Српска листа, за утре најави голем јавен протест поради, како што велат оттаму, бруталните обиди за убиство на српските момчиња Стефан и Милош Стојановиќ и Стефан Томиќ, но и за континуираната антисрпска репресија на режимот на косовскиот премиер Албин Курти.
Протестот е најавен за утре во 12 часот на платото пред домот за култура во Штрпце.
„Ги повикуваме сите граѓани од цело Косово и Метохија утре да дојдат на овој мирен и демократски протест, да им дадат поддршка на повредените и нивните семејства, но и да го кренеме гласот против тиранијата на Албин Курти, чија последица е заканата од мир и континуираниот прогон на српскиот народ на овие простори“,
се наведува во соопштението на партијата.
Од партијата додаваат дека овој Божиќ ќе остане запаметен како ден кога Србите повикале на мир, но и ден кога се пролеала невина српска крв.
Градоначалникот на Општина Штрпце и висок функционер на Српската листа, Далибор Јевтиќ, претходно најави дека на вториот ден од Божиќ ќе се одржи протест поради ранувањето на двете српски момчиња во оваа општина.
„Нашиот протест против тоа што им се случи на Стефан и Милош и сè што ни се случува во последно време, не заврши. Ги тргнавме блокадите, но во сите нас сè уште постои гнев. Во недела на 8 јануари, вториот ден од Божиќ, ќе се собереме во Штрпце пред Центарот за култура во 12 часот. Уникатно и заедно ќе испратиме порака дека ни е доста од терор и омраза, дека само сакаме мир и да бидеме свои луѓе“,
рече радоначалникот на Општина Штрпце.
Протестот следува откако вчера две момчиња од српска националност Стефан Стојановиќ (11) и Милош Стојановиќ (21) беа ранети во Готовуша кај Штрпце кога без причина, локален Албанец, пукал во нив од возило во движење. Момчињата потоа беа пренесени во болница каде се опоравуваат.
По неполни два часа од инцидентот, полицијата потврди дека го уапсила осомничениот А.К. (33) кој бил припадник на Косовските безбедносни сили (КБС).
Иако полицијата првично го блокираше сообраќајот на местото каде се случи нападот, вознемирени и револтирани граѓани потоа поставија барикади од дрва и гуми, кои ги отстранија по неколкучасовни преговори со полицијата.
Во меѓувреме, група Албанци ноќеска околу 2:30 часот го нападнале 18-годишниот Стефан Томиќ кој со својот брат се враќал од полноќна божикна литургија во Клокот, место во југоистокот на Косово. Тој се здобил со повреди на окото, раката, стомакот и нозете, а лекарска помош побарал во здравствена установа во Витина.
Неговото семејство го пријавило нападот во полиција која во моментов води истрага за случајот.
Извор: 360stepeni.mk
