Со изложба за Никола Мартиноски и концерт на евергрини на Камерниот оркестар на Битола, во придружба на хор и 11 солисти, в петок, (26 мај) ќе почне програмата на манифестацијата „Крушево – град на културата за 2023“, најавија денеска министерката за култура Бисера Костадиновска-Стојчевска и градоначалникот Томе Христоски.
„Не случајно што годинава, кога одбележуваме 120 години од Илинденското востание, даваме посебно значење и внимание на овој живописен град, богат со историја, наследство, сегашност и иднина, правејќи го и град на културата за сите домашни и странски посетители.
Крушево ќе пулсира во ритамот на македонската култура и ќе го промовира македонскиот идентитет и посебност. Во текот на оваа година Крушево нема да биде само дестинација за спортистите и авантуристичкиот туризам. Ќе биде и културен град во кој посетителите ќе бидат сведоци на многубројни настани, претстави, концерти, изложби и културни искуства кои ќе остават трајно влијание врз сите учесници од различни возрасти. Од уметнички инсталации и театарски продукции до музички фестивали и литературни собири, програмата за ‘Град на културата’ ќе биде прослава на креативноста во сите нејзини форм“, кажа министерката на пресот во Крушево.
Градоначалникот најави дека програмата за овој голем иницијален настан ќе започне со посета на галеријата Никола Мартиноски.
„Потоа продолжуваме кон Споменикот Македониум каде ќе посветиме програма под наслов – Безвременска хармонија која ќе има свечен дел, а потоа и концерт на Камерен оркестар од Битола, каде ќе настапат македонски музички ѕвезди како Елена Ристеска, Мики Јованскови Џафер, Ристо Самарџиев, Дарио, Кристина Арнаудова, Пере, Нокаут, Наде Талеска, Димитар Андоновски, Тамара Стојковска, Марија Цветаноска, Александра Трајческа, Хорот Коруновска Проарс“, кажа Христоски, додавајќи дека се најавени бројни гости од јавниот живот, дипломати и гости од странство, како што е градоначалникот на Нова Градишка Винко Гргиќ.
Главниот постер и дизајнот на логото ги изработи македонската дизајнерка со крушевско потекло Теано Кардула. На фесјбук страната за „Крушево -Град на културата“ е објавена нејзината приказна за идејата за логото, каде вели дека прва мисла ѝ била дека најпознатите елементи за Крушево треба да ги избегнат и време е да се дадем друга визуелна перспектива за градот.
„Крушевската стара архитектура изобилува со многу интересни мали детали и токму еден таков детал беше инспирација за ова лого. Тропалка за врата од старата куќа на фамилијата на мајка ми во форма на сонце. Уште веднаш знаев дека тоа е тоа. Симболично, стилизираните краци на сонцето го симболизираат и ова културно отворање на вратите кон градот.
Сонцето е и заеднички симбол на двете етнички групи кои живеат во самиот град – Власите и Македонците, но и нели македонското државното знаме кое нè обединува сите. А шареноликоста на логото, е токму тоа – обединети во различностите, таков е нашиот град“, стои во објавата.
Б. НЕСТОРОСКА
ИЗВОР: sdk.mk
