Шефицата на германската дипломатија во ненадејна посета на Харков

Освен испорака на оружје за Украина, германската министерка за надворешни работи Аналена Бербок понудила и конкретни понуди за помош на земајта во контекст на нејзиното приклучување кон Европската Унија

Германската министерка за надворешни работи, Аналена Бербок денеска ненадејно го посети источниот украински град Харков, во близина на руската граница, што е нејзина трета посета на Украина откако Русија ја започна воената инвазија на 24 февруари минатата година.

За време на нејзината посета, таа ги осудила нападите на Русија врз Харков, но истовремено ветила солидарност и поддршка за Украинците. Таа рекла оти сака цела Украина, „од Харков до Херсон до Киев“ да знае дека може да се потпре на солидарноста и поддршката од Германија.

Шефицата на германската дипломатија ветила нова помош за Украина, како што се генератори на струја и ќебиња, заедно со понатамошна испорака на оружје за земјата, а дополнително, рекла дека на Украинците им е потребно тоа оружје „за да ги ослободат своите граѓани кои сè уште страдаат од теророт на руската окупација“.  

Освен испорака на оружје, Бербок понудила и конкретни понуди за помош на Украина во контекст на нејзиното приклучување кон Европската Унија.

„Како влада сакаме да и дадеме многу конкретни понуди на Украина со цел да се зајакне владеењето на правото, независните институции и борбата против корупцијата, како и усогласувањето со стандардите на ЕУ“,

рекла Бербок.  

На патувањето, меѓу другите официјални претставници, ја придружуваа украинскиот министер за надворешни работи Дмитро Кулеба и украинскиот амбасадор во Германија Олексиј Макеив.

Кулеба го повторил долгогодишниот повик на Украина за испорака на тенкови и рекол дека не се сомнева оти Берлин на крајот ќе му ги даде на Киев посакуваните тенкови Леопард 2. Сепак, ѝ се заблагодарил на својата германска колешка за досегашната помош.