Резерватот за птици Арес во турски Игдир: Прстенувани 170.000 птици што мигрираат меѓу Африка и Русија

1 min read

ИГДИР (АА) – Во птичјиот резерват Арас во подрачјето на турски Игдир започна процесот на прстенување на птиците, јавува Анадолу.

Во Центарот за истражување на птиците Арас во селото Јукари Чијрикли, во областа Тузлуџа, од 2006 година се спроведуваат активности за прстенување на локалните птици, како и на птиците преселници, а потоа нивните движења се следат со помош на сателитски предаватели.

Со одобрение од Генералниот директорат за зачувување на природата и национални паркови, активностите ги спроведува Здружението КузејДога во поширокото подрачје на долината Арас, која ја користат птиците што мигрираат меѓу Африка и Русија и која е позната како еден од најважните миграциски патишта на птиците преселници во светот.

Оваа година започна 18-от процес на прстенување на птиците што секоја година го спроведуваат волонтери и истражувачи од неколку држави.

Според локалните власти, досега во подрачјето се прстенувани над 170.000 птици.

Кајахан Агиркаја, директор на Центарот за истражување на птици Арас, во разговорот за Анадолу истакна дека овие активности почнуваат секоја година со доаѓањето на пролетта, а процесот на прстенување на птиците продолжува до крајот на есента.

Тој рече дека годинава активностите на прстенување не можеле да се изведат брзо поради временските услови.

„Оваа година 18-ти пат по ред вршиме прстенување на птиците. Досега, за околу 45 дена оваа година, прстенувавме 1.200 птици од 61 вид“, рече Агиркаја.

Рече дека во изминатите 18 години собрале многу важни и корисни податоци.

„Досега прстенувавме повеќе од 170.000 птици. Околу 205 вида птици на кои им ставивме прстени ни покажуваат колку е навистина важна долината Арас“, додаде тој.

Агиркаја истакна дека активностите и студиите спроведени во долината Арас дале значаен придонес за светската орнитологија, односно гранката на зоологијата што се занимава со птици.

„Ова подрачје, кое е еден од важните миграциски патишта на птиците, всушност е миграциска маршрута од големо значење за целиот свет, особено што се наоѓа на миграциската линија од Африка што продолжува на север кон Русија и земјите од Источна Европа“, рече Агиркаја и додаде:

„Долината Арас е еден од најпродуктивните миграциски патишта на ова широко подрачје. Затоа, ова е подрачје што дава важен научен придонес.“

Научното прстенување на птиците е метод на истражување заснован врз индивидуално обележување на дивите птици.

Сите птици по постапката на прстенување веднаш се пуштаат неповредени на слобода на местото каде што се фатени.

Секое забележување на прстенувана птица, дали од далечина, повторно ловење и ослободување или пронаоѓање мртва птица, раскажува за нејзиниот живот, особено за нејзината патека на движење.



На веб страницата на Anadolu Agency (AA) објавена е само дел од содржината на вестите од Системот на проток на вести (HAS).

Извор: www.aa.com.tr

Претходно

Арсенал ќе биде активен на фудбалскиот пазар оваа лето

Следно

Турски МИТ на северот на Сирија неутрализира уште еден од челниците на терористичката организација ПКК

Latest from Blog