Во Прилеп е во завршна фаза изградбата на фабриката за селекција на отпад, проект кој претставува еден од најзначајните инфраструктурни за модернизирање на системот за управување со отпадот во општината. Станува збор за прва фабрика од ваков тип во Македонија, со современа технолошка линија за селекција.
Градоначалникот на Општина Прилеп, Дејан Проданоски, информира дека технолошката линија од реномираниот производител Technix е во завршна фаза на монтирање и ќе има капацитет за преработка до 10 тони отпад на час.
За време на увидот на терен, Проданоски заедно со директорот на ЈКП „Комуналец“, претставници од општинската администрација и главниот инженер од фирмата изведувач разговарале за текот на работите и следните фази од реализацијата на проектот.
Фабриката располага со 1300 кубни метри затворен простор каде што е поставена линијата за селекција на отпад, како и 5980 квадратни метри надворешен простор наменет за прием на отпад, манипулација со транспортни возила и складирање на селектираните материјали.
Со ставањето во функција на овој капацитет ќе се овозможи поефикасно раздвојување на отпадот, како пластика, хартија, најлон, метал и други рециклирачки материјали, што ќе значи помалку отпад на депониите и повеќе можности за рециклирање.
Според Проданоски, проектот има значење не само за Прилеп, туку и за целиот регион, бидејќи ваквите капацитети се клучни за воспоставување на модерен регионален систем за управување со отпад, каде што отпадот од повеќе општини ќе се третира на организиран и еколошки прифатлив начин.
Тој истакна дека целта на општината е создавање почиста животна средина, поодржливо користење на ресурсите и воведување современи решенија кои ќе обезбедат подобри услови за живот за граѓаните.
