По воведувањето на воената состојба во 2022, Јермак добива поголема власт од сите во Украина, освен од самиот Зеленски, а како што пишува Телеграф дел од интервјуираните него го нарекуваат „де факто лидер на државата“ и „потпретседателот на Украина.“
Пофалбата за Јермак е дека има ефикасен стил на директен менаџмент кој до сега има успеси како собирањето на десетици украински сојузници на мировен самит во Швајцарија кој треба наскоро да се одржи.
Меѓутоа во исто време, тој се смета за главниот човек кој ги спречува контактите меѓу Зеленски и Залужниј, пред првиот човек на украинската одбрана да биде сменет од неговата позиција.
Јермак го обвинуваат и за смената на заменик премиерот, Олександр Кубраков, кој претходно објави дека пратеници од партијата на Зеленски се обиделе да го отпуштат.
„И генералот и заменикот премиер, задолжен за украинската инфраструктура, беа масовно почитувани за нивниот интегритет, компетентност и независност,“ пишува Телеграф.
Поранешниот економски советник на Зеленски, Олех Устенко, кој е отпуштен во март годинава без објаснување тврди дека кругот на советници со пристап до Зеленски станува екстремно ограничен, „има неколку дузини што го советуваат Јермак, како и оние кој ги вршат валканите работи и сите се под него, како и неколку негови заменици.“
Двајца од овие заменици на Јермак се Олех Татаров и Кирило Тимошенко, чиј избор ги разгневи украинските анти-корупциски власти кои посочуваат на нивна вклученост во корупциски скандали.
Татаров е именуван за одговорен за реформи во спроведувањето на законите во земјата наспроти сите апели и барања на меѓународните партнери на земјата. Тој е под истрага за примање мито, „и наместо да го отпуштат, од кабинетот на претседателот побараа нови обвинители да го преземат неговиот случај и тие го затворија.“
Тимошенко пак беше наместен на позиција во министерството за одбрана каде што е одговорен за надзор на 647 милиони долари за изградба на фортификации на фронтот, истите оние фортификации за кои украинските војници се прашуваа каде се, кога руската армија минатиот месец упадна на север од Харков.
Минатата година истрага на Националната агенција за спречување на корупција открива дека Тимошенко вози Порше Тајкан, бесплатно престојува во луксузни ресорти, и ја злоупотребува својата моќ за да им дозволи на свои потчинети да патуваат во странство и покрај законите за мобилизација. Тој исто така приложил и фалсификувани документи насочени кон прикривање на негови прекршоци.
Телеграф ја пренесува изјавата на критичари на Зеленски според кои тој е многу различен претседател во зависност од тоа кој му е шеф на кабинет:
„Неговата голема грешка е што толку многу моќ му довери на Јермак, кој очигледно е опиен од моќта.“
ИЗВОР: off.net.mk
