Прскалки и конфети во разни бои, баш шарени и смешни како градов. Сите со телефоните во раце, фотографиираат нешто без врска, а речиси никој не забележува која песна оди во позадина. Нема ни што да забележиш, затоа што ЦД-то е истото од минатиот четврток и петок и од предминатиот и од лани. Барем јас таков впечаток имам, затоа што секоја недела истите песни на инстаграм ги слушам.
Вака почнува е-маил комуникацијата која скопјанец ја испрати до редакцијата на Скопје Инфо. Вели дека е разочаран од фактот што викендите во Скопје повеќе не се место за излегување и забава, туку за фотографирање и објавување на социјалните мрежи.
Колку и да изгледа модерно и убаво, тоа што се случува во дел од локалите во Скопје за време на викенд е бледа копија на клубовите од соседството. Прскалките во раце и конфетите во боја многу потсетуваат на еден клуб од соседството кој прилично е популарен во последните две – три години. Па, да бидам искрен, доколку објавиш фотка, не си нешто модерен и креативен, туку веројатно само депримиран и разочаран затоа што некој друг го прави тоа, на некое друго место кое е многу подобро од копиите кои личат на „Али Експрес“.
Ноќниот живот во Скопје се сведува на 2-3 ноќни локали, неколку кафеани и кажете ако грешам, но мислам дека периодов нема ноќен клуб кој работи после 12 часот. Или пак можеби има, ама се бројат на една рака и во нив собира многу малку луѓе. Станавме град во кој треба да дојде некој од најнискобуџетните пејачи за да направи гужва и тоа да биде настан кој ќе се раскажува цела недела.
– Во 2023 година, уште Даниела Мартиновиќ е најголем хит во градот. Скопје, за жал го сведовме на град кој повеќе личи на провинцијалска населба, каде доминираат дијалекти кои тешко ги разбирам, а многу често со нив се служат и некои од „битните“ менаџери вели тој и во е-маил комуникацијата и додава дека е разочаран што живее во скап град, но без никаква содржина и понуда.
– Патиме да бидеме видени, да се сликаме и да споделуваме на фејсбук и инстаграм. За жал цените на пијачките во локалите се речиси идентични со оние во Белград и Софија. Но, понудата на добри локали, кафулиња и ресторани во Белград и Софија е многу поголема во споредба со Скопје. И таа понуда веројатно е причината за содржината и изборот кој тие го имаат. Се што прават има смисол, изгледа убаво, не е копија и е сосема креативно, вели тој.
На крајот прашува има дали има надеж за ова мало парче од град кое ќе се обиде да стане идна метропола со содржини, клубови, барови во кои ќе ти биде мерак да ги поминеш викендите.
– До тогаш, ние нормалните луѓе „желни“ за добра журка, ако можеме ќе прошетаме некаде во соседството, а во меѓувреме ќе седиме дома и будно ќе ги пратиме „актуелните инстаграм доживувања“ на скопјани, заклучува тој.
ИЗВОР: skopjeinfo.mk
