Ќе се бориме сè додека нашите барања не бидат целосно исполнети, децидни се дел од пензионерите, кои изминатиов период постојано на улица бараа линеарно зголемување на пензиите.
Тие во Студио 10 на 24 побараа достоинствен пензионерски живот, но ги повторија и нивните нови барања. Меѓу другото, бараат оставки од актуелното раководство на Сојузот на Здруженија на пензионери како и да се донесе нов Закон за пензионерите.
Претседателката на Сојузот на здруженија на пензионери, Станка Трајкова пак со контра став и тврди дека нејзиниот мандат, кој впрочем е втор по ред е заслужен благодарение на огромните резултати изминатите години, додека таа е на оваа функција.
Освен времетраењето на мандатот, пензионерите бараат и покренување истрага за финансиското работење на Здружението, бидејќи, како што велат се сомневаат на незаконско работење и злоупотреба на службената должност. Трајкова ги демантираше ваквите обвинувања и истакна дека секој нејзин чекор за финансиското работење на Сојузот бил транспарентен и јавно достапен.
Инаку, во изминатиот период пензионерите ширум државата речиси секојдневно преку блокади и протести го искажуваа своето незадоволство и револтот од ниските пензии.
Извор: 24vesti.mk
