Отстранет е дефектот на системот на граничните премини, се пропуштаат возила за влез и излез

Од утринава неколку часа беше во прекин протокот на возила на граничните премини поради пад на системот. Поради тоа, на бугарските државјани кои денеска тргнаа кон Скопје да се поклонат на гробот на револуционерот Гоце Делчев им беше оневозможен влез во Македонија

Отстранет е дефектот на системот на сите гранични премини и се пропуштаат возила за влез и излез од земјава, информираат од Министерството за внатрешни работи.

Од утринава неколку часа беше во прекин протокот на возила на граничните премини поради пад на системот. Поради тоа, на бугарските државјани кои денеска тргнаа кон Скопје да се поклонат на гробот на македонскиот револуционер Гоце Делчев им беше оневозможен влез во Македонија.

Ова предизвика тензии и расправии на граничниот премин „Деве Баир“ каде што бугарски државјани, поради неможноста да ја преминат границата, упатуваа навреди и недолично се однесуваа кон македонската гранична полиција.

Како што објави Бугарската национална телевизија БНТ, на списокот на македонското МВР на лица на кои денеска не би им бил дозволен влез во земјава се 14 бугарски државјани. Во објавата на БНТ нема имиња.

Од бугарската агенција Беспартиен.бг на својот фејсбук-профил објавија дека добиле забрана за влез во Македонија. Тие во прилог на информацијата објавија и документ издаден од македонското Министерство за внатрешни работи.