Обезбедена е донација на книги напишани со Брајово писмо кои за првпат во Македонија излегуваат од печат, за дечињата со оштетен вид од ДУРМДОВ ,,Димитар Влахов” во Кисела Вода.
-Денес се одбележува Светскиот ден на Брајовата азбука, а во насока на унапредување на условите за учење и напредок, обезбедена е донација на неколку книги кои за првпат во Македонија излегуваат од печат.Се работи за насловите ,Големата Вода” во три дела, ,,Големи и мали” прв и втор дел, ,,Волшебното самарче” прв и втор дел, ,,Повикот на дивината” прв и втор дел и ,,Силјан Штркот”. Се работи за популарни книги кои сега ќе бидат достапни за слепите и учениците со намален вид, овозможувајќи им да уживаат во литературните изданија исто како нивните врсници, информираше градоначалникот на Кисела Вода, Орце Ѓорѓиевски.
-Важноста на овој подарок кој им го обезбедуваме е дотолку поголема ако се знае дека книгите напишани со Брајово писмо се скапи заради специфичниот начин на изработка, а исто така и ретко можат да се најдат и во слободна продажба. Сo учениците од ДУРМДОВ ,,Димитар Влахов” имавме средба непосредно пред Нова Година каде во весела атмосфера, на свечена приредба им доделивме пакетчиња, но воедно од мене добија и ветување дека грижата за нив, за унапредувањето на условите за нивното образование ќе остане високо на листата на моите приоритети на делување како градоначалник, додава тој.
ИЗВОР: skopjeinfo.mk
