Одлуката, која Владата ја донела на синоќешната седница, е објавена во „Службен весник“ и таа е веќе во сила
Владата може да определи обврска на трговците да прибавуваат и да продаваат определени видови и количества одделни стоки на потрошувачите, според определен редослед, се наведува во одлуката
Производителите и трговците имаат обврска да произведуваат и продаваат леб по замрзната цена откако Владата на синоќешната седница донела таква одлука, а таа е веќе во сила од моментот на објавување во „Службен весник“, односно од вчера. Одлуката ќе се применува до 31 мај годинава.
Од Министерството за економија за „360 степени“ наведуваат дека контроли дали одлуката се почитува или не ќе прави Државниот пазарен инспекторат (ДПИ), а за непочитување на одлуките се предвидени казни согласно Законот за трговија.
Со одлуката на Владата се определува обврска за трговците што претставуваат правни и физички лица, кои се регистрирани за вршење трговска дејност во соодветен регистар согласно закон, како и трговците што претставуваат правни и физички лица регистрирани за вршење производство, кои своите производи ги продаваат на пазарот во сопствени продавници или на други трговци на големо и мало со прехранбени производи, да прибавуваат и/или да продаваат леб бел и полубел (сечен на парчиња или цел).
Во вториот член на одлуката се определува дека треба да се произведува најмалку 80 отсто од лебот што треба да се продава по замрзната цена.
„Трговците што претставуваат правни и физички лица регистрирани за вршење производство, кои своите производи ги продаваат на пазарот во сопствени продавници или на други трговци на големо и мало со прехранбени производи, имаат обврска да го произведуваат и да го ставаат во промет лебот во количина од најмалку 80 отсто од производството на овој леб во декември 2022 година“,
се наведува во текстот на одлуката.
Во образложението на одлуката е наведено дека Владата може привремено да го ограничи вршењето на трговијата.
„Во образложението на одлуката што ја предложи Министерството за економија е наведено дека според членот 29 став 1 алинеја 2 и 3 од Законот за трговија, Владата може привремено да го ограничи вршењето на трговијата, во случај на сериозни нарушувања на домашниот пазар поради недостиг на стоки неопходно потребни за производството, преработката и за животот и здравјето на граѓаните и нарушување на домашниот пазар заради злоупотреба во прометот на одделни производи и стоки. Имајќи го предвид наведеното, според членот 30 став 1 алинеја 6 од Законот за трговија, Владата може да определи обврска на трговците да прибавуваат и продаваат определени видови и количества на одделни стоки на потрошувачите, според определен редослед“,
се наведува во соопштението испратено од владината прес служба.
Трговците посочени во оваа одлука, за испорачаните видови леб посочени исто така во одлуката, на производителот на лебот треба да му платат најдоцна во рок од 20 дена од денот на приемот на фактурата за испорачаниот леб.
Владата оваа одлука ја темели врз основа на податоците од извршени инспекциски надзори од страна на Државниот пазарен инспекторат. Врз основа на тоа, од Министерството за економија велат дека се утврдени сериозни нарушувања на домашниот пазар во градовите Скопје и Тетово, поради недостиг на бел и полубел леб, кој е сечен на парчиња или цел, за кои Владата на Република Северна Македонија донесе одлука за определување на највисоките цени за одделни производи во трговијата на мало, која стапи во сила на 28 февруари 2023 година.
ИЗВОР: 360stepeni.mk
