Напаѓачот во банката во Луисвил бил поранешен вработен, пукањето го снимал и го пренесувал во живо на Инстаграм

Осомничениот дваесет и тригодишник, според Си-ен-ен, бил известен дека ќе биде отпуштен од банката во Луисвил, каде што работел една година, по што напишал белешка до своите родители во која навел дека ќе пука во банката. Се додава дека тој го снимал и го пренесувал во живо пукањето во банката на социјалната мрежа Инстаграм

Полицијата го идентификуваше осомничениот напаѓач кој уби најмалку четири лица во банка во Луисвил, Кентаки, како Конор Старџен (23) кој бил вработен во банката, пишува Си-ен-ен.

Дваесет и тригодишникот, според Си-ен-ен, бил известен дека ќе биде отпуштен од банката во Луисвил, каде што работел една година, по што напишал белешка до своите родители во која навел дека ќе пука во банката.

Се додава дека тој го снимал и го пренесувал во живо пукањето во банката на социјалната мрежа Инстаграм. Снимката подоцна била избришана од социјалната мрежа, но се наведува дека полицијата го поседува видеото.

За време на нападот, осомничениот 23-годишник со пушка пукал во 13 луѓе, убивајќи четворица.

Загинатите се на возраст од 40, 57, 63 и 64 години. Останатите девет лица, од кои двајца полицајци и седуммина цивили, се повредени и се пренесени в болница. Тројца од повредените се во критична состојба, меѓу кои и еден полицаец кому му било пукано во главата.

Според полицискиот извештај кој го пренесе Си-ен-ен, напаѓачот бил застрелан и убиен на местото на настанот од страна на полициски службеници кои пристигнале во банката три минути откако ја добиле пријавата.

Гувернерот на Кентаки, Енди Бешеар, изјави дека еден од убиените во масовното пукање е негов близок пријател и нареди до петок оваа недела сите знамиња низ Кентаки да се веат на половина копје.