ГАЗА (АА) – Уште најмалку 25 Палестинци се убиени во израелските воздушни напади врз две куќи во северниот и централниот дел на Појасот Газа утринава, додека израелската Армија ја продолжува својата геноцидна војна врз палестинската енклава, јавува Анадолу.
Очевидци за Анадолу изјавија дека израелските воени авиони погодиле трикатница во близина на болницата „Камал Адван“ во Беит Лахија во северниот дел на Појасот Газа, убивајќи 18 Палестинци и целосно уништувајќи ја зградата.
Околу 12 други се водат за исчезнати под урнатините, додаваат сведоците.
Во централниот дел на Појасот Газа, болницата „Ал-Авда“ соопшти дека уште седум лица се убиени, а шест се повредени во израелски воздушен напад врз југозападната област на бегалскиот камп Нусејрат.
Болницата објави и снимка од медицинските тимови кои се обидуваат да ги извадат телата од погодената куќа.
Очевидци за Анадолу изјавија дека израелски воен авион удрил и целосно ја уништил куќата на семејството Бајјуми во бегалскиот камп Нусејрат, при што биле убиени седум лица, додека други две се водат како исчезнати.
Израел започна геноцидна војна во Појасот Газа во која се убиени речиси 44.800 луѓе, главно жени и деца, од 7 октомври минатата година.
Меѓународниот кривичен суд на 21 ноември издаде налози за апсење на израелскиот премиер Бенјамин Нетанјаху и поранешниот министер за одбрана Јоав Галант за воени злосторства и злосторства против човештвото во Газа.
Израел е обвинет за геноцид пред Меѓународниот суд на правдата за неговата војна против Газа.
Извор: Anadolu Agency (AA)
