По острите реакции во јавноста за одлуката за помилување, Комисијата поднесе колективна оставка за што информираше Гордан Калајџиев еден од членовите. Тој во својот кус статус не неговиот фејсбук профил напиша дека се воделе од професионални принципи.
Покрај Калајџиев во Комисијата членуваа и професорите Методија Каневчев, Арлинда Кадри Шахиновиќ, доктор Зоран Митиќ, Ана Ѓорѓиева Ивановска и Ајтен Шаќири. Претседателката Гордана Силјановска Давкова ја прифатила оставката и најави консултации за нов состав, но и за слабостите во системот на помилување. Премиерот Мицкоски целата одговорност ја гледа во Комисијата и вели дека членовите ја констатирале грешката и постапиле доблесно со тоа што поднесоа оставка.
-Жив човек кој што работи, знае и да погреши. Кога ќе се констатира грешката ако се преземе одговорност, тогаш тоа е и доблесно и јас така можам да ја коментирам одлуката на членовите на Комисијата која што се занимава со теми од областа на помилувањето. Констатирана е очигледно грешката и единственото нешто што тие го имаат како морален чин тоа е да се повлечат и тоа и го направија, така што очекувам тука да се затвори таа тема во јавноста, изјави премиерот Христијан Мицкоски.
Но за СДСМ темата не е затворена, тие бараат одговорност од претседателката Силјановска. Велат дека Комисијата за помилување со својата оставка е жртвено јагне во овој скандал.
-Очигледно власта мисли дека Комисијата треба да биде жртвено јагне за да се спаси Силјановска и нарачателите на ова скандалозно помилување. Претседателката Силјановска ги дава и одлучува за помилувањата, не Комисијата и целосната одговорност е кај неа. Скандалозното помилување мора да има одговорност и за Силјановска и за нарачателите. Силјановска помилуваше и нарко-бос и осудени криминалци вмешани во шпионски афери, изјави Методија Илиевски од СДСМ.
Одлуката за помилување на осуденици, претседателот на државата ја носи по препорака на Комисијата за помилување, која е постојано работно тело во служба на претседателот.
ИЗВОР: ТВ 21
