Полицијата соопшти дека група малолетници си играле криенка и се криеле во соседните дворови кога Дејвид В. Дојл пукал од пиштол
Властите во американската сојузна држава Луизијана обвинија 58-годишен маж дека пукал со огнено оружје кон група малолетници кои си играле криенка и ранил 14-годишно девојче. Инцидентот се случил рано наутро во неделата во градот Старкс, Луизијана.
Полицијата соопшти дека група малолетници си играле криенка и се криеле во соседните дворови кога Дејвид В. Дојл пукал од пиштол. 58-годишниот маж им рекол на полицајците дека видел некои сенки пред својата куќа, а потоа земал оружје и почнал да пука во луѓето кои бегале од неговиот имот, пишува Си-ен-ен.
Притоа тој застрелал 14-годишно девојче во задниот дел од главата. Девојчето е пренесено во болница со повреди кои не се опасни по живот. Инцидентот се случил во слепа улица во кој живеат само три семејства – Дојл, семејството на жртвата и роднина на семејството на жртвата.
Дојл е обвинет за напад, незаконска употреба на огнено оружје и нанесување повреди.
Извор: 360stepeni.mk
