ИСТАНБУЛ (АА) – Мајка која ги загуби двата сина и сопругот во минатонеделните земјотреси во јужна Туркије, сега ја бара својата 21-годишна ќерка, јавува Анадолу.
Лекувањето на 37-годишната Чигдем Ѓулер, која беше повредена во земјотресите што ја погодија Антакија во областа Хатај, продолжува во болницата во Истанбул.
Ѓулер тагува за загубата на нејзиниот сопруг и синовите, но се прашува за судбината на нејзината ќерка Невин, која лежела на психијатриската поликлиника при државната болница во Антакија кога се случија земјотресите.
„Нејзиното име не се наоѓа меѓу оние кои се спасени од урнатините на болницата што се сруши“, изјави Ѓулер за Анадолу.
Таа рече дека останала под урнатините речиси 40 часа. „Не ја изгубив свеста додека бев под урнатините. Не можев да дишам. Фала му на Бога, спасена сум, но сум повредена. Но, срцето ме боли повеќе. Единствената желба ми е ќерка ми да се најде жива. Ве молам помогнете, таа е мојата единствена надеж“, рече таа.
Според последните податоци, најмалку 40.642 луѓе ги загубија животите, а над 108.000 се повредени во двата силни земјотреси што ја потресоа јужна Туркије на 6 февруари.
Земјотресите со јачина од 7,7 и 7,6 степени, со епицентар во Кахраманмараш, погодија над 13 милиони луѓе во 11 турски области – Адана, Адијаман, Кахраманмараш, Дијарбакир, Газиантеп, Хатај, Килис, Малатија, Османије, Елазиг и Шанлиурфа.
Извор: www.aa.com.tr
