Во Битола е во завршна фаза изградбата на нова, современа противпожарна станица која ќе ги унапреди условите за работа на пожарникарите и ќе овозможи побрз и поефикасен одговор при интервенции во градот и поширокиот регион.
Објектот се простира на парцела од 3.300 квадратни метри, со корисна површина од 1.600 квадратни метри, и моментално е изграден до фаза на карабина, со веќе поставена дограма.
Новата противпожарна единица ќе има клучна улога во заштитата на граѓаните, имајќи предвид дека ја покрива територијата на општините Битола, Ресен, Могила, Новаци и Демир Хисар.
Градоначалникот на Општина Битола, Тони Коњановски, истакнува дека со овој капитален објект значително се зајакнува инфраструктурата за противпожарна заштита и се подигнува нивото на безбедност за сите жители во регионот.
