Дел од правните експерти кои беа поканети од министерството за правда да учествуваат во работната група за подготвување на уставните измени за телевизија „Телма“ потврдиле дека ќе бидат дел од групата, дел пак се уште размислуваат, а некои пак веќе ја одбиле поканата.
Поранешната министерка за правда и образование која воедно е и професорка по уставно право, Рената Дескоска за „Телма“ изјави дека се уште има дилеми дали да ја прифати поканата. Вели дека се уште не дала согласност, но и дека нејзиното учество ќе зависи од задачата и форматот на групата.
„Не сум се сретнала со премиерот, ниту со министерот за правда во врска со уставните измени. Не сум дала согласност за учество во работна група за измена на Уставот. Моето евентуално учество ќе зависи од задачата која ќе биде зададена и форматот на работната група. Во моментов информациите во јавноста за овие прашања се нејасни“ – вели професорката по уставно право на правен факултет“,
изјави Дескоска за „Телма“.
Од друга страна, позитивен одговор дале професорот Јетон Шасивари, но и поранешната судијка во Судот во Стразбур, Маргарита Цаца Николовска која кажа дека во рамките на нејзиното богато искуство е подготвена да даде свој придонес во оваа експертска група.
Но има и такви кои го одбија повикот. Еден од нив е академикот Владо Камбовски кој рече дека добил покана но истиот го одбил бидејки во моментов нема политички консензус, а смета и дека работите се поставени наопаку. Тој кажа дека мора да има силен политички договор и поддршка за промена на Уставот и дека постои процедура која треба да се почитува.
Инаку, претходно денеска понудата за учество во работната група ја одбија најголемата опозициска партија, ВМРО-ДПМНЕ, чиј лидер Христијан Мицкоски кажа дека во оваа фаза тоа е беспредметно и оти власта сака да го политизира процесот.
„Нема да учествуваме во работната група, тоа сме го кажале многу пати во минатото, ги кажавме и причините затоа што работата на оваа работна група сега во оваа фаза е тотално беспредметна. И врвни правни експерти го коментираат тоа, дека овој прв чекор е практично утврдување на потреба за отворање на Уставот и доколку има две третини тогаш веќе се формира Уставна комисија, па се разгледуваат амандамни, се драфтираат, итн. Сега е тотално беспредметно, сакаат да го политизираат процесот. Еве уште еднаш јавно го кажувам ставот, и повеќе нема да се занимавам со таа тема, дека ВМРО-ДПМНЕ нема да учествува во работатата на Комисијата која ја формира Министерството за правда, а има цел да работи на амандманите кои се потребни за уставните измени“,
рече Мицкоски.
Негативен одговор пристигна и од Алтернатива од каде кажаа дека не може да постојат работни групи за изготвување или пак за подготовка на уставните измени се додека не се постигне консензус помеѓу политичките партии за поддршка на овие измени, кои се неопходни за продолжување на интеграцијата на земјата во Европската унија. Негативно одговори и Демократски сојуз на Павле Трајанов од каде кажаа дека промената на македонскиот устав е неприфатлива без реципроцитет, но и дека сѐ додека Бугарија го негира македонскиот народ, како и автентичноста на македонскиот јазик, Република Македонија не треба да почнува постапка за промена на Уставот.
ИЗВОР: 360stepeni.mk
