Двајцата лидери, како што соопштуваат од Кремљ, ќе разговараат за тематски прашања за понатамошен развој на сеопфатни партнерски односи и стратегиска соработка меѓу Русија и Кина
Кинескиот претседател Си Ѓинпинг од денеска до 22 март ќе престојува во државна посета на Русија на покана на рускиот претседател Владимир Путин, а фокусот на средбата, според официјален Кремљ, ќе биде ставен на натамошниот развој на партнерските односи меѓу двете земји.
„Двајцата лидери ќе разговараат за тематски прашања за понатамошен развој на сеопфатни партнерски односи и стратегиска соработка меѓу Русија и Кина“,
соопшти Кремљ.
Портпаролот на кинеското Министерство за надворешни работи Ванг Венбин рече дека целта на посетата е дополнително продлабочување на билатералната доверба и додаде дека шефот на кинеската држава ќе размени мислења со Путин за клучните меѓународни и регионални прашања.
За време на посетата се очекува да бидат потпишани повеќе билатерални документи.
Според портпаролот на Кремљ, Дмитри Песков, најпрво е планирана средба во четири очи меѓу Путин и Ѓинпинг, а потоа и заедничка вечера. За вторник се планирани разговори во проширен круг.
За кинескиот лидер Си Ѓинпинг посетата на Русија и средбата со претседателот Владимир Путин е можност да го покаже растечкото дипломатско влијание на Кина на светската сцена и нејзината амбиција да го оспори глобалниот поредок предводен од САД.
Пекинг ја означи посетата како „патување на мирот“, каде што Ѓинпинг треба да „игра конструктивна улога во промовирањето на мировните преговори“ за војната во Украина.
Пред посетата на Ѓинпинг на Москва, неговиот руски колега Владимир Путин рече дека Русија е благодарна за „добро избалансираниот“ став на Кина за војната во Украина.
Во изјава објавена пред средбата на двајцата лидери, Путин вели дека посетата на Си го потврдува руско-кинеското партнерство.
„Имам големи очекувања за претстојните преговори“,
рече Путин додавајќи дека пријателството меѓу двете земји постојано се зацврстува.
Рускиот претседател рече дека Пекинг и Москва ги координираат своите надворешнополитички позиции за да им се спротивстават на заедничките закани.
„Благодарни сме за кинеската линија на рамнотежа во однос на настаните во Украина, за разбирањето на нивната заднина и вистинските причини. Ја поздравуваме подготвеноста на Кина да да даде значаен придонес во решавањето на кризата“,
рече Путин.
Тој додаде дека Москва е загрижена поради неодговорните и опасни дејствија кои ја загрозуваат нуклеарната безбедност и повика на укинување на санкциите. Русија е отворена за политичко и дипломатско решение на украинската криза, вели Путин, но повторува дека не може да има разговори за мировниот процес без да се земат предвид геополитичките реалности.
Посетата на Ѓинпинг на Кина е негова прва по речиси четири години. Кина официјално не ја осуди руската инвазија на Украина, но досега главно се придржуваше на санкциите кон Москва. Официјален Пекинг, исто така, сигнализира дека евентуална руска употреба на нуклеарно оружје е неприфатлива.
Посетата на Ѓинпинг на Москва беше официјално потврдена во петокот. Неколку часа по најавата, Меѓународниот кривичен суд издаде налог за апсење на рускиот претседател Владимир Путин за наводно воено злосторство – присилна депортација на украински деца во Русија.
Извор: 360stepeni.mk
