Три месеци откако беше изгласана, падна француската влада. Мнозинство пратеници му изгласаа недоверба на премиерот Мишел Барние. Клучната задача на Барние, која го донесе и неговиот пад, беше усвојувањето на буџетот за 2025 година, кој, како што порача треба да се справи со дефицитот на земјата преку зголемување на даноците и намалување на трошоците од 60 милијарди евра.
Но, Барние успеа во намерата да се одобри нацрт-законот за финансирање на социјалното осигурување, користејќи член од уставот, кој и дозволува на владата да донесе законски решенија без гласање во парламентот. На оваа одлука, неколку партии, пред се левицата и десницата одговорија со гласање недоверба.
„Не можам да ја прифатам идејата дека институционалната дестабилизација би можела да биде целта што ги собира мнозинството претставници во време кога нашата земја се соочува со длабока морална, економска, финансиска и граѓанска криза.“ – Мишел Барние поранешен премиер на Франција.
Од опозицијата порачуваат дека гласањето недоверба е знак на надеж и дека огромното мнозинство Французи ја поддржуваат таквата одлука..Го обвинија и Емануел Макрон дека го оставил францускиот народ во неизвесност непосредно пред Божиќ.
„Емануел Макрон ги напаѓа темелите на нацијата во последните седум години. „Само со неговата оставка тој може да ја извлече земјата од ситуацијата во која се наоѓа..“ – Марин Ле Пен претседател на партијата Национален Фронт.
За попладнево, најавено е обраќање на Емануел Макрон. Француските медиуми, повикувајќи се на извори од елисејската палата, наведуваат дека Францускиот претседател има намера за брзо време да назначи нов мандатар, можеби дури уште и вечерва.
Во меѓувреме, од Француската унија на мали и средни претпријатија предупедуваат дека со неусвојувањето на буџетот, се ризикува од катастрофа на една од водечките европски економии.
„Ако Франција остане без буџет, тоа ќе ја отвори вратата за должничка криза, чии последици сериозно ќе се одразат на економијата.“ – Унија на мали и средни претпријатија на Франција.
Ова е првпат од 1962 година француската влада да падне поради гласање недоверба. Тогаш беше соборена владата на Жорж Помпиду, додека претседател на земјата беше Шарл де Гол. Со гласањето недоверба, владата предводена од Барние стана влада со најкраток век од која било администрација на Петтата француска република, која започна во 1958 година.
Извор: 24vesti.mk
