ДУБАИ (АА) – Иран денес погуби тројца мажи обвинети за смртоносно насилство за време на минатогодишните антивладини протести и покрај приговорите на групите за човекови права, пренесува Анадолу.
Мизан, веб-страницата на правосудството, објави дека се погубени Маџид Каземи, Салех Мирхашеми и Саид Јагуби, без да наведе како се извршени смртните казни. Властите тврдат дека тие убиле полицаец и двајца членови на паравоената група Басиј во Исфахан во ноември, за време на протестите низ земјата.
Групите за човекови права наведуваат дека тројцата биле измачувани и принудени да признаат на телевизија.
Протестите во Иран избија во септември минатата година поради смртта на 22-годишната Махса Амини, која беше уапсена од државната полиција за морал во Техеран поради наводно кршење на исламскиот кодекс на облекување.
Иран погуби вкупно седум лица во врска со протестите. Групите за човекови права наведуваат дека овие луѓе биле осудени на смрт од страна на тајните судови на државната безбедност и дека им е ускратено правото да се бранат.
За време на протестите во Иран загинаа над 500 луѓе, меѓу кои и десетици припадници на безбедносните сили. Уапсени се околу 19.000 луѓе, а многу од нив потоа се ослободени.
Извор: www.aa.com.tr
