БЕРЛИН (АА) – Илјадници луѓе се собраа вчера пред познатата берлинска Бранденбуршка порта, повикувајќи на мировни преговори со Русија, која води војна во Украина, пренесува Анадолу.
Левичарската политичарка Сара Вагенкнехт и активистката за женски права Алис Шварцер, кои го организираа собирот, повикаа на прекин на огнот и мировни преговори со Русија.
Вагенкнехт повика на „прекин на крвопролевањето“ во Украина по повод првата годишнина од руско-украинската војна. Собирот е пренесуван во живо на платформата Јутуб.
Таа предупреди на можен „нуклеарен пекол“, доколку руската војна ескалира во Украина.
Вагенкнехт и Шварцер пред две недели објавија „Манифест за мир“ во кој го повикаа германскиот канцелар Олаф Шолц да ја „запре ескалацијата“. Критичарите ги обвинија Вагенкнехт и Шварцер дека се „наивни“.
„Со поддршка на Западот, Украина може да добие поединечни борби, но не може да ја добие војната против најголемата светска нуклеарна сила“, наведуваат авторките во Манифестот.
Тие подвлекоа дека „ниту една страна не може да победи воено“ и дека војната може да заврши само на преговарачка маса.
„Да се преговара не значи да се предадеш. Да преговараш значи да се направи компромис од двете страни за да се спречат стотици илјади смртни случаи и уште полошо“, нагласуваат авторките во „Манифестот за мир“.
Извор: www.aa.com.tr
